الناشر "
Unknown
" فى 3:25 م
بِـقلمْ / محمد رضى بناني
فينكوم يا المسؤولين
فينكوم نهار تقلب الكار
ليلة شعلات النار
فينكوم يا المسؤولين
ما تصلحو طريق
ما تطفيو حريق
ما نلقاوكوم فالضيق
فينكوم يا المسؤولين
صيفطتو خوتنا وولادنا للقبور
ولصقتو التهمة فالشيفور
ودابة علاش متطفيوش النار
ولاصعيبة عليكوم جات بلا شوار
فينكوم يا المسؤولين
كنشفوكوم من ربع سنين لربع سنين
من يامات الانتخابات كتهزو الرجلين
كتعلاو وتحدرو علينا الراس والعينين
فينكوم يا المسؤولين
عقولكوم مخدرة بالطمع
ولاحد فيكوم لوجاعنا يسمع
ما ترحمو لعين المسكين لي تدمع
فينكوم يا المسؤولين
تقتلو الميت وتمشيو تدفنوه
وفم المظلوم بالظلم تخيطوه
ولي دوا على حقو مكروه
فينكوم يا المسؤولين
حقنا عند الله محفوظ خليكوم ناعسين
وبلا ما تشخرو راحنا لشخيركوم سامعين
